Fliek Vlooi: Fantastiese monsters maak jou kinderlik opgewonde

Fantastic Beasts and Where to Find Them is ’n 2016 fantasie fliek wat geskryf en vervaardig is deur elke Harry Potter aanhanger se held, J.K. Rowling.

Hierdie fliek is deel van Rowling se Wizarding World-reeks, wat begin het met die Harry Potter flieks. Fantastic Beasts and Where to Find Them speel af in ‘n fiksionele 1926 toe die Britse towenaar en magiese dierkundige, Newt Scamander (Eddie Redmayne), New York toe kom in sy soeke na die een of ander rare magiese gedierte.

Hier bevind hy hom alleen, met ’n tas vol fantastiese towerdiere in ’n stad waar hekse en towenaars as gevaarlike vyande gesien word. Om dinge erger te maak, ontsnap van sy monsters uit die tas, en moet hy hulle vang voor hulle te veel skade in die stad aanrig. Kort voor lank hardloop hy hom vas in Tina Goldstein (Katherine Waterston), ’n voormalige heksejagter, wat hom uiteindelik help om sy monsters op te spoor, en ’n nóg groter, nóg gevaarliker gedierte deur die strate van New York te jaag.

Dit vat nie ’n geharde Harry Potter-fanatikus om hierdie fliek te waardeer vir wat dit is nie. Die fliek is magies en laat jou weer van voor af terug verlang na die eerste Harry Potter, waar ’n wêreld van toorkuns en fantastiese gebeure vir die eerste keer vir jou oopgemaak is.

Ek gee Fantastic Beasts and Where to FindThem 8/10. Dit maak jou kinderlik opgewonde en motiveer jou om al jou ou Harry Potter boeke af te stof en weer te begin lees. Ek sal die fliek vir enige iemand aanbeveel.

Die DVD is beskikbaar om uit te neem by DVD4home op die hoek van Retiefstraat en Govan Mbekirylaan, of skakel hulle by (018) 293 3895.

  AUTHOR
Marianke Saayman
Journalist

Latest News

COMMENTS

Carletonville HeraldParys GazetteSedibeng SterVaal Weekblad
Top