Summier selle toe oor sperstreep is snert

police,saps
Illustration photo

’n Stemboodskap het onlangs die rondte op WhatsApp gedoen wat beweer dat daar nuwe verkeerswette in plek is om mense summier in hegtenis te neem as hulle ander voertuie oor ’n sperstreep verbysteek.
Die betrokke stemboodskap, wat deur verskeie mense in Potchefstroom ontvang is, waarsku dat daar reeds mense sonder keuse van ’n boete hieroor in hegtenis geneem is.
Volgens Malcolm Grimbeek, hoof van die munisipaliteit se verkeersafdeling, is die waarskuwing nie heeltemal akkuraat nie.
“Dit hang af hoe roekeloos die persoon bestuur het. In geval van so ’n inhegtenisname word klagtes gewoonlik bygevoeg soos onder meer onbedagsame en roekelose bestuur,” het hy gesê.
Later het ’n senior aanklaer ook ’n stemboodskap gestuur wat die bewerings as onwaar bestempel.
Hy voer aan dat enige verkeers- of polisiebeampte hulle diskresie moet gebruik of hulle ’n persoon in hegtenis wil neem vir ’n verkeersoortreding.
Volgens hom is die normale praktyk om ’n boete uit te reik van tussen R1 000 – R1 500 wanneer iemand ’n sperstreep verontagsaam.
“’n Persoon kan wel in hegtenis geneem word wanneer daardie persoon ’n sperstreep op ’n roekelose wyse in aankomende verkeer, of op ’n blinde hoogte verontagsaam,” sê hy.
Hy het dit duidelik gestel dat dit nie ’n wet is dat enige persoon wat op ’n sperstreep verbysteek summier toegesluit gaan word nie.
“Ek wens die mense wat hierdie boodskappe stuur dadelik ophou, dit skep paniek by die publiek en dit is van alle waarheid ontbloot,” het die aanklaer gesê.

  AUTHOR
Dustin Wetdewich
Journalist

Latest News

COMMENTS

Carletonville HeraldParys GazetteSedibeng SterVaal Weekblad
Top