Veiligheidsinstellings fnuik motordiewe

AfriForum se Klerksdorp-buurtwag het op 8 Maart saam met verskeie ander veiligheidsinstellings ’n gesteelde voertuig suksesvol help opspoor en aan die eienaar terugbesorg.

Die betrokke voertuig is omstreeks 18:30 by die Matlosana-winkelsentrum in Klerksdorp gesteel. Die verdagtes het aanvanklik na Vierfontein, en daarna deur Viljoenskroon, Parys en Sebokeng gevlug. Die SAPD en verskeie buurtwagte in dié dorpe is van die diefstal in kennis gestel en die Gauteng- en Noordwes-blitspatrollies is ook ontbied. Veiligheidsinstellings van nabygeleë dorpe, insluitend Fochville, Potchefstroom en Vereeniging, het ook bystand tydens die soektog gebied.

Die Gautengse blitspatrollie het die verdagtes in Sebokeng agternagesit en die gesteelde voertuig in ’n sloot tot stilstand gedwing. Die verdagtes het die voertuig verlaat, maar kon weens die bosagtige terrein nie opgespoor word nie.

“AfriForum wil al die betrokke partye vir hul hulp en bystand bedank. Samewerking tussen veiligheidsinstellings en die polisie is die sleutel tot die bekamping van misdaad,” sê Riechert van der Merwe, koördineer van AfriForum se Klerksdorp-buurtwag.

 

Latest News

COMMENTS

Carletonville HeraldParys GazetteSedibeng SterVaal Weekblad
Top