Curriebeker RugbyRaai

WP en Sharks gereed vir groot Curriebekereindstryd

Wouter Pienaar
Na die dramatiese halfeindstryd tussen die WP en die Blou Bulle die afgelope naweek, brand die Curriebekervure veral hoog met Saterdag se eindstryd tussen die WP en die Sharks wat weer ‘n rillerwedstryd kan opdis.
Die WP is met ‘n kortkop die gunstelinge met tuisveldvoordeel op Nuweland en sal hulle seisoen op die perfekte wyse wil afsluit met Curriebekeroorwinning nommer 35. Die Sharks sal wel die pynlike gevoel van ‘n tweede plek wil verdryf nadat hulle in verlede jaar se eindstryd ook net-net teen die WP verloor het.
In 2017 het die Sharks in die eindstryd op hul tuisveld teen die WP verloor en hulle het nou die perfekte kans om wraak te neem op hulle opponente se tuisveld.
As ‘n mens net na die talent op die veld kyk, sal hierdie eindstryd enige rugbyliefhebber se mond laat water.
Aan die WP se kant is die spoedvrate soos Damian Willemse, Dillyn Leyds en Sergeal Petersen wat teen die Sharks se Aphelele Fassi, S’bu Nkosi en Curwin Bosch te staan kom. Verder sal die WP weer moet steun op SP Marais se flink skopvoet om weer die punte in te samel, veral in ‘n taai eindstryd waar skoppe baie keer die wedstryd kan bepaal. In dieselfde asem sal die Sharks losskakel, Robert du Preez, ook sy skopskoene moet aantrek. Voorlangs sal sy broer, Daniel du Preez se stryd met Sikhumbuzo Notshe op agtsteman, ook interessant wees.
Die meeste van ons voorspellers glo dat die WP hierdie stryd sal vat en dit sal interessant wees om te sien of die Sharks vir ‘n opskudding gaan sorg. Verwag 80 minute van top Suid-Afrikaanse rugby.

Carletonville HeraldParys GazetteSedibeng SterVaal Weekblad
Top